Índice 
“Para falar an mirandés hai que lo mamar”
L derretir de la niebe i de l tiempo
Panes cun murron
Ls çapatos de tacon alto
La spalda
Lusbel, l diabro
L uolmo de l Minga
La cunfisson
Jarónimo carteiro
Las maias
L criado mintiroso
L perro scumioso
Las purmeiras missas de l pastor
L Natal de Matias
Natal de tie Bernixe
La mona negra

“Para falar an mirandés

hai que lo mamar”

SUZANA RUANO

ou sou neo-falante de mirandés. Filha de pai mirandés i de mai

de baixo, mais precisamente de la zona de Abeiro. Nunca an mie

casa se falou an mirandés. Oubie-lo falar a miu pai, cun quaije

que toda la giente menos an casa, na rue culs bezinos mas só antre eilhes,

porque comigo, la filha de la tie de baixo, la lhéngua anbergonhaba-se ou

anton achában que you nun ls antendie. La berdade ye que, anquanto fui

pequeinha nunca dei grande balor a isso. La lhéngua, dua maneira ou

doutra, siempre fizo parte de la mie bida i de la mie proua an ser mirandesa

i ser mirandesa siempre fui algo que me çfrenciou por todos ls lhados por

adonde andube.

Na scola, quando me dórun a scolhir antre tener relegion i moral, Mirandés

ou ningua de la dues, scolhi la última. Nun haba dúbedas que se fura hoije

serie çferente i l Mirandés fazerie parte de l miu currículo scolar. Na

ounibersidade, siempre que me preguntában se sabie falar mirandés, you

dezie “Un cachico.” Fazie siempre um brilharete. “Cachico!” “Que giro! O

que é que significa?” I you chena de proua respundie “Um bocadinho!” I

assi quedaba. La berdade ye que apuis desta respuosta la maior parte

quedában tan sastisfeitos, que nun me pedien que zambuolbira mais la

cumbersa i you toda cuntenta. Dalguas bezes que acunteciu pedíren que

falara mais, pus cumo qualquiera mirandés que se preze respundie-le algo

asparcido cun “ Fui a lhebar las bacas al cerrado i cerrei l portielho”.

Quantas bezes yá oubistes esta frase? I que habie you de dezir? Fui l que

you siempre oubi i mesmo sendo you criada nua casa adonde las bacas

nunca fazírun parte de las nuossas rotinas, achaba por bien respunder assi i

resultaba.

Apuis de salir de la ounibersidade la bida lhebou-me por bários caminos

mas l camino de la música mirandesa, que yá quantá habie ampeçado,

nunca parou de se fazer i chegou l tiempo an que tube ganas i coraije para

ampeçar a falar mirandés an público, an palco, mas fui sol de pouca dura.

Nun s’adomina ua lhéngua se la falarmos solo an oucasiones speciales.

Oubi cousas cumo “Tu nun falas l mirandés berdadeiro “, “L Mirandés ten

que ser mais scarrapachado”. Deixei-me acagatar i la bergonha an falar mal

mirandés fui crecendo.

Hai ua frase, demasiadas bezes repetida, que ten, na mie oupenion,

amachacado muito: “Para se falar an mirandés hai que lo mamar”.

Ne l meio de las mies ansiguráncias cun este tema de l mirandés, aparciu-

me la ouportunidade de trabalhar cula i pula lhéngua. Purparei-me para ua

antrebista falada an mirandés, nun me purparei para ua antrebista screbida

an mirandés, cun traduçones i outras cousas que tales i la cousa nun corriu

mui mal porque antrei i sou ua trabalhadeira de la Associaçon de Lhéngua i

Cultura Mirandesa.

Passado mais de un anho a recolhir l mirandés por todos ls lhugares adonde

se fala, a oubir las cuontas de giente que inda nun sabie falar i yá chorában

an mirandés, a oubir las opiniones bárias cumo: “L mirandés berdadeiro ye

eiqui nesta zona”; “Adonde se fala melhor l mirandés ye naqueilha zona”;

“Eilhi yá nun se fala mirandés mas eiqui si”, i mormente a fazer l sfourço

por falar an mirandés todos ls dies, puodo dezir que sou ua falante de

mirandés.

An cunbersa c’un amigo, a quien me queixaba de la mie bergonha an falar

mirandés porque nun me salie purfeito preguntou-me: “Tu quando bás para

Anglaterra falas an anglés? I falas-lo purfeito?” i you arrespundi: “Falo

cumo sei!”. “I anton qual ye la çfrença? L mirandés nun ye ua lhéngua

cumo las outras?” “Pus si. Hai que la falar.”

L mirandés ye ua lhéngua cumo las outras, ua lhéngua minoritaira i

minorizada, que se muorre un cachico de cada beç que se mos muorre un de

ls nuossos bielhos i que ganha bida siempre que haba dalgun que perda la

bergonha i la fale cun quien l steia delantre, seia mirandés ou seia de baixo,

seia de la cidade ou doutro lhugar qualquiera.

Tornando a la frase que scolhi para títalo deste miu pensamiento: “Para falar

mirandés hai que lo mamar!” corrijo “Para falar mirandés hai que lo falar!”

_________

1. L derretir de la niebe i de l

tiempo

AMADEU FERREIRA

oubo un anho - anhos sessenta de l seclo XX - de nebadas i

cencenhadas tan fuortes que s’alhargórun las férias de l Natal por

mais uns quinze dies de lhibardade sien tino: lhembra-se-me bien

de querer que nunca aqueilha niebe se derretisse, de que l tiempo

s’ancarambinasse colgado de ls telhados i janeiro nun se deixasse acurtiar

ne l choro de ls chupos a derretir-se; la cuncéncia de l tiempo ye mais fuorte

quando nun mos deixa fazer l que tenemos de fazer, i cumo sabe bien aquel

arrolhar dua spera que mos pon la lhibardade a la puorta, niebe que

podemos agarrar a las ambuças i cun eilha sfuracar la deceplina a boladas, i

rindo-mos deilha an caramonos cun nariz grande i uolhos de bulhaca; yá

uns anhos que nun antraba por janeiro alantre na mie tierra i esses dies

fúrun cumo un renacer, ua besita a un paraíso que yá muitá habie perdido:

nun bonda la cuncéncia que tenemos de ls sítios, mas ye eissencial la

cuncéncia que deilhes tenemos ne l tiempo: la mie tierra an janeiro nun ye

la mesma que pula Páscoa, ne l berano ou por dezembre afuora, porque todo

demuda i l zaspero ye que demuda sin nós, tamien partecipantes de la

mudança: nun ye possible ponermos la bida stendida nun assomadeiro i

deilhi mos assomar-mos i quedar a ber todo a demudar i nós siempre na

mesma, i ye esso que la niebe mos trai de nuobo: al derretir-se, scuorre por

eilha l tiempo i ben-mos ua atrecida cuncéncia de cumo nun hai carambelo

que mos mantenga eiternamente.

_________

2. Panes cun murron

ADELAIDE MONTEIRO

i. Hoije yá nun stou nerbosa. Ui onte! Staba tan nerbosa. A la ua,

porque nun mos bacinórun. A la outra, inda para pior, porque mos

ancerrórun eiqui a todos ls que nun lhebábamos la bacina.

Tu si m´habies dezido trasdonte isso, mas a mi yá se m´habie passado. Yá

se me bárren muito las cousas. Anton si yá tenemos ls tals... que nun sei,…

cumo deziste? Ls anticuorpos, si. Bá, cada cousa! Son anton defesas contra

l bicho, Mas ténen que mos dar apuis, nun ye berdade? Qu’anden cun

cousas i apuis que nun téngamos ls tals anticuorpos que dizes, que mos

chegue!

Staba derramada. Apuis pedi-le un chá a Mónica i quedei melhor. Ou que

fusse de l chá ou que fusse de mi, quedei melhor. Mas mira que you inda

nun stou cumbencida dessa de nun mos dáren la sigunda bacina, a quien

tubo la Cobid essa. Nun me finto muito. Nien se me ruobe mui bien.

Não, nun tengo cantado. You yá só strago ls fados. Esse que stás a cantar

nunca l soube. Dizes que ye cigana la que canta. Ai quem me dera ter outra

vez vinte anos, tamien you digo! Nunca habie oubido l nome Cidália

Meireles. You cantaba d´Amália, de Teresa Tarouca, de Francisco Jesé, de

Marie Teresa de Noronha, i assi porende.

Alguns ciganos qu’andában porqui cantában bien. Poulino i Anofre nacírun

an Einfainç. Éran mielgos. Milagre que se me lembre! Si. Stában a ua

semana an cada pobo i apuis agarrában an sous aternates anriba de l carro

de burros i íban-se para outro pobo. Que bida, assi sien eira nien beira!

Aqueilhes dous éran mui amigos d´ajudar. Si. Éran de l tou tiempo i tamien

de Rulinda Ostícia. Jogában a las palombas cun bós i al que calhaba. Un die

faleste-le a Rulinda, no Centro, que bien a mi me dá fé. Percureste-le se era

Rulinda i eilha dixo que si. Diç que nun daba fé de ti. Nun bés, eilhes

andában por esse mundo. Apuis cuntou-te la bida, cuitadica i l que habie

passado cun l sou tiu que diç que le daba muita porrada. Cuitadica. Dezie-te

eilha: a senhora stá mais noba do que eu. Eu sofri muito!

Ls pobres tamien assi andában, duns lhugares par´outros.

Mai Ana daba pousada a muito pobre. Ua beç ajuntórun-se alhá trés. You

inda era pequeinha i mai Ana dixo-me que le disse l caldo. Al almuorço.

Apuis you querie ir pa la jolda i ampuntei-los. Salírun. Si. Dei-le l caldo.

Está bem menina, já bamos. Uas bezes drumien no nuosso palheiro, outros

no de tie Chica que era mais acerca. L Bezinho quedaba an casa de tie

Marie, que el yá antes quedaba an casa de tou bisabó Munteiro. Esse

amborrachaba-se. Apuis Zé Abílio tenie que puxar a el pal lhebar pal

palheiro. Esse tiu tenie q´haber sido mui zaragata que tenie la cabeça chena

de seinhas de piteiras. Andaba siempre c’ua gorra ambaixo de l chapéu para

que nun se le bíssen.

Andában muitos a pedir. Uns de l Cunceilho, outros doutros sítios. Quando

tu eras garota i mocica si parában muito an nuossa casa tamien. Mai Ana

daba pousada i era mui smoleira. Cuitadicos. Quemien l caldo, i mai ou l

que fusse a dar la palha a las bacas, acendie l lampion i lhebaba-los pal

palheiro. A las bezes deixában alhá piolhos. Milagre que tebíssen! Quando

you era garota tenie-los todo mundo.

Ua beç you i Glória, sentemos-mos a ua brigada, a la punta de baixo de l

cerrado de las Hourticas, no camino. Ua brigada mui buona. Apanhemos ua

carga de piolhos. Yá era moça. Aquilo tenie stado alhá dalgun pobre i

deixou-los. Ua beç passou-le la mesma a Eirnesto, alhá pal Turril, nun

sintalho an pie de l camino, a la borda de l boqueiro de l sou cerrado. Un

sentalho mui buono, an cantarie. Até l cós de las calças staba chenico. Tanto

piolho, tanto piolho! Aquilo andubo-se a catar i nun ls matou.

Misérias. Ls pobres naquel tiempo nun passában fome. Apuis de l binte

cinco d´Abril metírun-los nua Casa i eilhes nun gustórun. Mais querien

andar suoltos. Milagre! Era cumo star nua prison. Mira tu que eilhes

aquestumados a nun tener amo nien senhor!?

Maneilhas si pedie tamien puls pobos. Sous pais tamien éran cimplicos. Sou

pai fazie scrinhos na Pruoba. Eilhes nun íban puls pobos. Yá se morriu,

Maneilhas.

Tiu Amarico era mais na Speciosa. Ana! Tu nun me darás ua smolica de

lheinha? Zé Amaro si andaba. Tie Sabastiana Pimienta era mui mal

ancarada, la cuitada. Ui, que si era bien mal ancatalinada! Falaba siempre

atrabessado a tiu Amarico. El stubo an Cuba. Bien se te lembra que falaba

un pouco spanhol. Cuitadicos! Acabórun cun todo i quedórun a pedir.

Nós dezimos cimplicos. Cimpricos nunca oubi, porqui.

Bá anton! Yá dei bien a la palheta. L telemoble nun se fui abaixo. La

Mónica andubo onte eiqui a abri-lo. Apuis trazes outro. Nun bal la pena

mandares pul correio. Quando benirdes…

_________

3. Ls çapatos de tacon alto

ADELAIDE MONTEIRO

polheiro quedaba mesmo porriba de la portica de la frauga de tiu

Abelino. A la nuitica, era ber la família de Spabilado a chubir por uas

scaleiricas feitas cun un palo seco i scalones de tabras pregadas. Ls polhicos

atrás. Por fin l galho pedrés, para se certificar que ningua franga s’iba a

namorar cun dalgun franganote de tie Marie Munteira. Era mui fino i, de tan

fino qu’era, tiu Abelino chamaba-le Spabilado.

Habie ua ruoda dun carro de las bacas stribada a la parede de la frauga,

mesmo de caras pa l lhume i la çafra. Era ende que Spabilado se scundie

todos ls dies, para ber cumo l ferreiro aguçaba las reilhas, amanhaba ls

çadones, ls çachos, las fouces ou algua faca que, por star mui melhada,

precisasse de ser temprada cun aço. Arriba de todo, quedaba ancandilado a

ber fazer las ferraduras. Querie calçar todo quanto bicho menudo houbisse

na Speciosa.

Malhai cun mais fuorça, caralho! boziaba tiu Abelino als malhadores (el

dezie muita praga). Nun sei para quereis esse cuorpo tan grande! Spabilado

assustaba-se i arrecolhie la cabeça.

Apuis assomaba-se outra beç a la jinelica de la ruoda para ber meter la

ferradura n’auga de la pila. Outra beç al lhume, outras malhadelas apuis que

burmeilha i, al fin, l ferreiro fazie ls buracos de ls crabos que habien de

sigurar l çapato al casco i a las cçcanhetas.

Anton nós nun habemos de tener çapatos cumo ls de las bacas i de ls burros,

que telíncan quando pássan na ruga? percurou Spabilado a l’Assemblé de

Bichos Pequeinhos qu’ajuntou an pie de la moreira. Hei-de-bos calçar a

todos, nun seia you l Galho chefe desta tierra!

Ls sapos i las ranielhas fazírun cordelina i, colgados, l pormeiro siguraba l

baraço de l fuolhe i l sapo campaneiro quedou na punta de baixo para dar l

baláncio para que assi l aire salisse cun fuorça i l lhume ardisse.

Spabilado, l ferreiro; dous gatarrones charruscados, ls malhadores. Ls ratos

roubában la quemida i las pitas éran las cozenheiras. Ls perros quedában

d’atalaia al pie de la fuonte para abisar se tiu Abelino aparecisse a las eiras

abaixo, benido de Zenízio, adonde iba a aguçar reilhas.

- Quando tiu Abelino chegue, todo mundo se çcalça i sconde ls çapatos!

abisou Spabilado.

La franga pelada, prouísta i moderna, nun se calhou anquanto sou pai nun le

fizo çapatos de tacon alto c’uas charrascas de fierro na punta.

Cuitadica! Partiu las patas quando se caiu de ls tacones abaixo i, a la

purmanhana, staba de rebimbas, a la puorta de la frauga, inda cun ls

çapaticos calçados.

Quien las habie de pagar? Spabilado!

Zdende, Spabilado fui l meneador de l fuolhe i rapaç de mandiletes de tiu

Abelino até, cun sou trabalho quedar pago l fierro, l aço i l carbon de piedra

que dou cabo.

Ye mesmo spabilado este caralho deste galho, dezie para el mesmo tiu

Abelino, quando miraba para Spabilado todo ancarbonado!

_________

4. La spalda

ALCIDES MEIRINHOS

aqueilha Terronha si habie parido la galhega!

No ampeço de la scola ajuntába-se la garotada toda: de Cicuiro

até Infainç la carreira anchie-se de gente i de merendas. L cerron

de la roupa nun pesaba, quatro ou cinco pares de meias, trés ciroulas, dues

mudas de roupa i un par de botas mercadas na feira l Naso, dous dedos

maiores que l pie para que serbíssen até outro Eimbierno. Ne l outro saco,

dues fogaças, ua dúzia de tabafeias, dues chouriças bochas, cinco quilos de

toucino para adubar l caldo i l stómado a la hora de merendar.

- Toca a espabilar para daprander la letra a ber se sodes capazes de

chegar más loinge que nós. Ála deiqui para fuora que çofar tierra toda la

bida ye carga de más para maquila tan scassa.

Dezien nuossas mais i abós fartas de canseiras, cobradeiros de alma i de

canielhas al redor de meia dúzia de cepas de parreira, jeira de pan ou lheira

de freijones.

Inda más loinge? Arre carai! Trés meses sien ber a Cicuiro i inda achában

que era acerca! Quanto más loinge tenerie que chegar, se mius pais yá

habien bibido uns meses no Alanteijo, acerca de l sítio que matórun l

General que nun tenie miedo. Na Índia andubo deportado miu abó, adonde

daprandiu a ler. A dalgun sítio haberiemos de chegar. Amportante era

chegar bien i ir de buona gana. Á nó que nun íbamos, eilhi éran fiestas

porque nun habie burros que guardar, ferreán para apanhar, lheinha que

cortar, auga para acarrear a la fuonte, cousa que la cidade nun precisaba

porque yá estaba tona ancanhada. L pior inda era habituar-se un a la retrete

tan branquita tan branquita que metie duolo anxeminá-la i apuis andar cul

bardeirico a sgodar para nun quedar cun pegotes nien botasse malos

oulores. Modernices! Quanto nun balie la parte de trás de ua touça ou las

loijas, siempre era más eiquelógico do que anturbiar auga buona para buer

cun estierco de purmeira.

Deixaba un rastro de polareda la carreira – de la Sigunda ou de la Quinta

porque noutros dies solo de tácce ou burro – ne l sou roncar de muito

cabalho i fierros a chocalhar pula streita strada de xeixos i saibro que mos

lhebaba a camino d’tua nuoba bida, an que fusse solo por meses.

Quando daba la rebolta de l Alto de la Cabreira abrie-se l mundo: ua

cidade!! E apuis la Sé i l Castielho (sbarrulhado mas era l castielho), l riu i

la barraige sien cumparança cula caliendra de ls molinos de Matáncia ou

cun l cubo de l molino de Tiu Juquín Torrado adonde se apanhában sardas

anquanto se molie la carrada de sacos. Ampeçaba la çcubierta de quaije

todo para tanto garotico cun dieç anhos ou pouco más.

Al pie de l celheiro era la nuossa paraige, mesmo eilhi al pie de la scola de

casas berdes ancarreiradas de beta, un campo de la bola i ua noeira. Tanta

gana de bibir na cidade e inda quedábamos a la puorta! I toca, la carreira a

çpejar garotos a bozear, sacos de batatas, fardelas, cerrones, bolsas, cestas

de uobos cun cheiro a galhinaça, presuntos, un lhibro de leitura de la quarta

classe i uolhos cun ganas de angulhir l mundo.

Manuol yá staba a nuossa spera cul carretielho para lhebar l sustento i l

agasalho para uns meses. Quedábamos an casa de miu padrino, puorta cun

puorta cul ciclo nas traseiras de l cata bento para adonde a las bezes inda

íbamos a acumpanhar l home que fazie las leituras de l’auga i de l papel

queimado pul sol quando batie na gorda lente de bidro. Seguiu camino la

carreira i cada un iba arrecadando l que le pertencie, esta bolsa ye mie,

aquel fardel ye de Rosa, mira la cesta de Carlos, la mala de Florinda, las

batatas de Adriano, staba todo mundo naquel purparo quando apuis de dues

corridas al redor de tanta tralha sal ua boçt que anté atelundraba las arribas:

- I la mie spalda?!?! Adonde stá la mie spalda ?!?!?!

Carai! La espalda de Jesé nun estaba. I agora?! Inda houbo quien botou un

Á Á Á … Pon-te listo! Houbiras-te spabilado. Pus mira Jesé, se perdiste la

spalda nun sei cun que chicha bás a untar la torrada por las purmanhanas.

Na çpensa de sou abó solo habie quedado un persunto para ancetar nas

matáncias i l toucino era l sustento para ambolber cun pomientos

burmeilhos na merenda de sementeira.

Jesé quedou amarielho, aspuis burmeilho, meio a çaçamelar por bias de se

star a ber sien chicha, uolhos que parecie que íban a botar más auga que l

galaton de ls Lhameirones.

- Bai a ber se quedou na carreira, brutico! Bozeou Rosa.

Ganhou coraige, dixo-le a Manuol para lhebar la bolsa de la roupica i la

pelhiça, quando pegou nua corrida atrás de la carreira, que yá habie passado

las muralhas, para ber se inda apanhaba la spalda.

Apuis de çpejar la carrecholada no cabanhal de casa, you e Moisés

agarremos l carretielho i toca adreitos a la central de l Cabanelas na Praça.

La spalda de Jesé habie quedado solica arrimada a la parede de la Cámara

sien ua arresbunhadela nien dentada na saca de çarapelheira que l’ambolbie,

pus quaije nun se bien perros naquel tiempo.

Al tornar para casa ls uolhos de jesé rien-se a boca chena mirando la

caçcanheta que tamien fazie de natura de la saca.

Nunca la ruodra de fierro dun carretielho cantou ua música tán alegre nas

manos de Jesé an riba de ls paralelos de las rugas de Miranda.

_________

5. Lusbel, l diabro

ALCIDES MEIRINHOS

e San Martino bieno Antonho, filho yá moço de tie Marie

Cortiçuola, la mai, l pai Álbaro i l armanico Chico Maleitas que

tamien aporbeitában para ber a tiu Luisito – inda pariente de

loinge de l abó de Álbaro - i tie Sesária, la mulhier que deixara la tierra de l

tango para acumpanhar l sou home que nunca s’afizo nas Pampas.

Corrie l més de márcio de l anho de mil nuobe cientos i cinquenta i dous.

Las pessonas íban-se amanhando de l melhor modo no campo de la

curralada de la Abadia para ber l quelóquio “Auto de todo mundo e

ninguém” amanhado por tiu Delgado suobre l auto de l Gil Vicente cul

mesmo nome i ansaiado por el mesmo i tiu Cagon durante todo l eimbierno.

L tabrado d’apersentaçon, a meio camino antre l forno i la portalada de

cantarie, anfitado de yerbas, brimes cun hieras, colchas de lhana i lhençoles

de lhino, daba quelor a un die de sol baixo a amanaciar auga. Él eran

chapéus nuobos, cholas de strena, xambras de renda, saias cun riscas de

beludo, camisas de poplina i calças de cotin feitas por tiu Chico Coxo,

capas cun honra i sien honra, de Cicuiro, San Martino i d’outros lhugares

que habien benido a ber la gente i la cuonta.

Ua croua era la paga por cada pessona, ls garoticos nada, solo quien yá

habie pagado “las antradas”, esse ritual d’einiciaçon por que todos passórun

ou haberien de passar quando l canhuto bien crecido ampeçasse a ancobrir

las partes!

Aqueilhas cuontas tan bien andonadas deixában nuobos i bielhos cun

cumbersas para meio anho i las rapazas queloradas solo de mirar mocidades

tan pimponas! Tiempo de tirar aranheiras, sacudir la polielha de las bistas,

amostrar-se i fazer l rónsio na mirada de sgueilha i meia risica a dalgun

pimpon farrusteiro, quanto más nun fusse para acirrar ls de l lhugar inda

meio andebles na scuolha ou no çprender de la bergonha.

Ampeçou meio morna la cuonta al salir la profecie, cuonta que fui

ganhando fuorça assi que cada figurante salie de sou sítio: habie l cielo, la

taberna, l’eigreija i l einfierno, adonde de beç an quando s’assomaba un

fachuco a arder que Lusbel abanaba atrás de las colchas. De l cielo

sbolaciában na punta dun bareiro santicos brancos de álas amanhadas cun

prumas de pita.

A alturas de la cuonta estaba l anjo a terminar ls sous dezires i ls anjicos a

sbolaciar quando de la puorta de l einfierno sal Lusbel, l diabro, acagaçando

todo mundo l más que podie, porque essa tamien era ua de las sues

oubrigaçones no quelóquio.

- Á Á Á… TRUMM TRUMM TRUMM…

Ampeçou a boziar, a bater la calagouça i ls pies çcalços cun toda la mecha

no tabrado.

- Á Á Á… quantos lhiebo hoije pal caldeiron de los einfiernos? Á Á Á …

TRUMM TRUMM TRUMM … hoije si s’inche! Ui tanta alma eilhi

abaixo!

I ponie la mano na tiesta an palma birada para baixo cumo quien quier ber

loinge guardando l mirar de l sol.

- TRUMM TRUMM TRUMM… Á Á ÁÁ…

Que diabro tan bien cumpuosto aquel Zé Polreta: bóç gorda, cara

spintarroxada de negro i burmeilho, un rabo de tranças de lhana negra

anroscadas nua brime a balanciar siempre que abanaba la cintura i las

nalgas. Las manos, ls zinolhos, las poças de ls quetobielhos i de ls

carcanhales stában tan cagados que se calha habie stado meio anho ou más

sien se lhabar tal era l tamanho de las cotras, a bien dezir ua sola cotra, más

ou menos negra cunsoante quedaba nos altos, nos funchacos, nas manos ou

nas caçcanhetas.

Cada garotico scundie-se atrás de sue mai ou adonde podie, siempre que

Lusbel salie de l einfierno. Tembrában cumo las fuolhas de l álamo a la

puonte de baixo. Ui que miedo… era pior do que salir a las nuites sien

pagar l bino i dar-se de caras cun tiu Bicente! Se l diabro era assi nun

estranhaba que l’eigreija quedasse chena de almas nos Deimingos a horas

de missa! Rezones de sobra para ber tanta mulhier a antrar i salir de l

cunfessionairo cul miedo de ir a parar nas manos de Belzebu, nó que l

abade botaba un oulor i ua cumbersa capaç de marear la cabeça a dalgua

más medrunca nessas cousas de relegion.

Assi que Lusbel acabou las falas a dezir que Todo Mundo eirie al einfierno

…

“Tudo como pensei

Não me enganei em nada

Já está tudo cheio

Na minha infernal morada”

… quedórun más assossegados ls ninos quando bírun zaparcer la calagouça

de cabo anciscado, las greinhas negras chenas de palha i la stameinha

amprestada pul ferreiro.

Seguiu la fiesta no terreiro cun baile de cuncertina. Nuobos i bielhos

beilórun até cair l sol dun deimingo a fin d’eimbierno. Buírun-se uas pingas

i até l anjo que tan bien habie guardado l cielo de l cuntino arremeter de

Lusbel, caminaba a las regubiuras al salir de la taberna.

Ua semana apuis desta funcion, staba Antonho a ampeçar la relba na baixa

de la Bicha nua tierra de teçteira nas Calçadas, cun sou armano Chico

Maleitas, que andaba çcalço por bias de ls calhos nacidos de pisar puolo,

xeixo i chinas, guardador de la cabra i dous chebicos pequerricos na

passaige que lhieba al Molino de la Raia.

Zé Polreta na frente de sue junta de bacas unhidas cula rabela a roçar la

trasga i l timon a arrastar, guelhada na mano, passada cumpassiada cun aire

sereno, mal ancarado cumo quaije siempre, bai abaixando adreitos a la

tierra de Ourrieta la Falgueira ancurtiando camino anté l pastorico.

Ancáran un cun outro, Chico ampeça a tembrar… a tembrar… ye l diabro,

nun ye, asparecer si s’asparece, cara retratada i cagada cumo siempre, l

cheiro inda nun s’habie tirado que l’auga staba frie… que fago? quedo-me

calhadico que stá eilhi miu armano ou scapo-me antes que m’agarre?

Zé, al se dar de cuonta cumo staba atarantado l nino, inda l metiu más

miedo. Nisto, solta cun boç de truniada:

- Anton rapaç, como-te la mocha ou lhiebo-te ls chibos?

Ai que si ye l diabro Lusbel… Dius m’acuda maizica de l cielo… i la pior

parte ye que nun podie ir adreitos al armano arador porque antes tenerie que

passar por Lusbel. Acagaçadico de todo, sien fala, pelos de punta cumo

quien bei l lhobo, atirou-se rodeira abaixo i, á paticas! era bé-lo a zolar

adreitos a la ribeira. Cumo las cholas nun pesában i albarcas nun habie, ls

dedicos fúrun quedando marcados na tierra inda meio fresca i nas poças

d’auga de l camino até San Martino, quaije ua lhégua de camino. Corriu

tanto i tan assustado que solo mirou para trás quando chegou al meio

lhugar.

- Á Zé, para que me assustas l garoto que ye capaç de se chimpar an dalgun

poço de la mina! boziou Antonho.

- Nun tengas miedo que el sabe l camino.

…

Dous ou três anhos antes de se morrer, yá arrimado a uitenta anhos, staba

Zé Polreta sintado an sou puial soalheiro quando passa Demingos i un

farrusteiro, ruga arriba adreitos al Balhe de la Baglina.

- Dius mos dé buonas tardes, Zé! anton a sorber la racica caliente?

- Buonas tardes mos dé Dius. A espreitar par’adonde las melras lhieban l

çubiaco a ber se l çcubro l nial.

Mas mirando l farrusteiro, curjidoso cumo siempre, perguntou:

- I quien ye este pimpon que ben cuntigo?

Fizo-se siléncio i cumo nun houbira respuosta de fala, ls uolhos tentórun

adabinar l que cada qual pensaba nessa cumbersa de mudos, até que l

farrusteiro ancarando a Zé Polreta bien nos uolhos, purmeiro cun cara de

poucas fiestas, aspuis más ameroso, stendiu-le la mano, cumpassiou la bóç i

atirou-le:

- Pus mira que se fura hoije nun me scapaba a correr sierra abaixo nó! you

nun sei se fui de l cheiro se de tanta “belheza” mas solo parei debaixo l

scanho, borradico de miedo !

Por ua beç resbalou de la squina de l uolho cara abaixo ua lhagrimica

ambergonhada a Lusbel. Alhebantou-se estribado no caiato, abraça a Chico

Maleitas, mira pa la prieça de casa i cun aire de santo solta la bóç:

- Á Marie! Trai la chabe de l’adega que yá tenemos cumpanha para poner la

torneira a la cuba de dieç almudes!

Además, ye tamien Lusbel, al tiempo, l speilho de la bida nun qualquiera

lhugar de l Praino.

_________

6. L uolmo de l Minga

ALFREDO CAMEIRÃO

subrolho stendie-se cumo ua manta porriba de Tortulhas i nun serie

perciso ir al bruxo para adibinar que la truinada nun tardarie a

atrelundar I pobo cun ua porrada de auga i truonos capazes de

scachar ua fraga. Yá ampeçaba a relhistrar pa ls lhados de Rita Molino.

Anté peç que un se atafanhaba cun I peso de l aire i nun se bie un germo an

la rue. Tamien, yera la hora de la séstia i, cun aqueilha calma, quien serie

home de andar pul termo a fregir Is miolhos ambaixo de I rechino de I sol…

A la tardica se farie pula bida, por anquanto Tortulhas drumie la séstia ne Is

xaragones de casa ou a la selombra de Is cabanhales ou de algun uolmo, que

Is habie balientes i cun fuorça por to I pobo. Habie un silenço cumo an la

eigreija quando I padre alhebanta la hóstia. Tortulhas gozaba I çcanso de Is

justos i deixaba semir la calma de la tarde a drumir.

Toda?! Nó, nun staba I pobo anteiro a drumir.

Ambaixo de l uolmo de I Minga, I altar staba cumpuosto, cun las

xaldroqueiras de I questume. I nun yera por acauso que se iban a poner eilhi

a fazer la renda i a çfazer la fama de todos Is que les caíssen ambaixo de las

bandeiras: I uolmo quedaba ne I meio de I pobo i naide poderie passar pa I

prado ou camino de Miranda que deilhi nun se bira; quedaba cerquita de I

tanque de l Trufal, adonde tenie que parar quien salisse cun la cria; i, nó

menos amportante, podie-se ber quien antraba i salie de la taberna de l

Canastra. Assi, I uolmo de l Minga, ademais de selombra i frescura, tamien

le daba l unto pa Cozer ls “dixo-me-lo, dixo-me-lo” cun que ampestában

Tortulhas,

Stában alhá quaije todas i la ourdidura iba animada:

- Diç que onte meia dúzia de garotos zgraçórun I cerdeiro de tiu Foustino -

dezie la Magalhanas, ua tizica seca i semida ambaixo de I lhenço i de Is

xambres, cun las agulhas an las manos angurriadas, a dar, a dar, más

apuosta a la renda do que se fura a tirar I pai de la forca - que nun bundou

anchir la barriga, que inda le scochórun uas galhadas.

- Diç que fúrun Is dous de la Pesa, i I de tiu Armando Galhardo, I más

bielho, Zé Petisqueiras, que yá nun ye garoto niun...- ajuntou Marilice,

gorda i medrada, cumo ua masseira, cul atadeiro de I mandil a stourar po

riba de las banhas, abornalada an la punta de I fincon deitado que le serbie

de puial - ...i diç que I tou tamien iba, ah Clotilde, you nun ye por tal, mas a

mi dezÍrun-me-lo…

- Mal rais ta parta Is correios, que debrebe tráien las nobidades - responde la

Clotilde, burmeilha cumo un temato, afeita als zmandos de I filho, que eilha

bien sabie que yera scalhabrés - i anton quien fui I xodairo que te I dixo?

- DezÍrun-me-lo, nun amporta quien, que you nun gusto de amantar an

naide, you nun sou dessas de mercar eiqui i bender eilhi. You tamien lhougo

le dixe que I tou nun habie de haber sido,que el nun ye de ls de la

quemandita de ls outros - i ls uolhos de la Marilice amarrórun pa la renda,

anquanto la boca arremedaba ua risica de caçuada, farta de saber, eilha i to l

pobo, que I filho de la Clotilde i ls dous de la Pesa nun se zapegában, trás

de las buiadas a poner las rateiras als páixaros, a jogar la bilharda,

anjoldados to l die çque salien de la scuola anté que tocában a las

Trindades. I puls bistos tamien acumpanhában a las cereijas.

- Cun quien anda I miu Américo, ou queda de andar, nun le amporta a

naide. Mas trai la barriga chena, nun percisa de la ir a anchir als cerdeiros

de tiu Foustino. La cumenéncia, uas cereijicas que parécen caganetas de

coneilho!

-Bah, deixai-bos alhá disso... quien fui, fui bien... I garunho de I Foustino

fui-le bien ampregue, el ten muita cereija… - acalpou I Alberto Picoto, I

Burron, solteiron de 50 anhos, arrimado a la armana Delaide i a bibir an

casa de I cunhado, que nunca habie mirado para ua rapaza cun ganas de le

ser buono, mas, anton, siempre de buolta de las ties, a scheirizar i siempre

çpuosto a lhebar i a trazer, tamien, sobraba-le I tiempo, que I trabalho fazie-

le denteira.

- Bós nun oubis, diç que la rapaza de la Çáncia stá preinha, cuntórun-me-lo

trasdontonte, a mi custou-me a fintar... siempre camino de la missa, un

bidrico que nunca le daba l aire, i agora ua destas…

- You yá quantá que I oubi... i mirai que quien me I dixo ye porque I

sabie…

- I siempre ye de l rapaz de tiu Polho? -percurou Marie Cándida que nun

yera assi mi faladeira mas tamien le gustaba sfuracar an la bida de ls outros.

-Diç que si... mirai un garoto que inda nun hai nada inda trazie las calças

rachadas.... quaije que inda nun pon nabalha an la cara!...

- El yá fui a sacar las sortes?

- Quedou libre, nun bedes que le falta un dedo, que I stroncou cun un

foguete...

- Ye mas ye un rapaz bien pimpon - i l Burron picaba nun cachico de cortiça

cun la nabalha que siempre trazie ne I bolso de l jaleco… - bós nun I bedes

passar eiqui para baixo i pa riba, siempre tan scrinchado, tan lhambidico!...

Cumo depriessa I farrapico de la Marimélia I caçou... la santulária, a la

spera que I çubiaco le fura a parar al bico…

L aire cuntinaba abafadiço i más pesado que uas quantas arrobas de cortiça.

Yá se ampeçában a oubir las squilas de alguas bacas que salien de la corte i

uas palabras suoltas, alhá parriba... TortuIhas spertaba de la séstia dua tarde

de berano.

- Mirai, alhá ben tie Dorteia! Que le haberá passado pa benir tan tarde, i

lhougo eilha que le gusta tanto ua joldica!

- Inda bien que se quedou an casa! A las bezes ten ua cumbersa tan mofosa!

La tardiega iba-se arrimando pa l pie de I uolmo, debagarico, peç que meio

ouxada, pori amorrenhada cun la calma que abafaba Tortulhas.

- Anton, mulhier! L que bos passou que peç que benis mi piloxa?!

- Deixai-me alhá que stou mi anfastiada! Tengo I stómado tan anrezinado!

- Chiçcou-le a l’augardiente onte a la nuite i apuis sabe-le la boca a chapéu

bielho - rezungou I Burron antre dientes, cun las narizes amarradas pa la

cortiça, a modos que la Dorteia nun oubisse.

- Yá buistes un bunchico de augardiente? A mi, ye remédio santo pa las

maleitas de I stómado!

- Nun ye isso, mulhier! Bós andábades siempre: “café, café”,i you hoije,

apuis I almuorço, tamien quije spurmentar. Mas nisquera fui capaz de

acabar I cacharrico que fiç... rebolbiu-me la barriga... i amargoso, que you

sei alhá!

- Pori nun le botestes açucre! Mirai que sien açucre si amarga muito!

- Botei-le dues colheradicas, mas comi-lo i nun gostei nada d’el!

- Comistes-lo?! Mas anton bós cumo fazistes pa I comer?

- Ai, cumo fiç! Anton cumo habie de fazer pa I comer?! Pus, arramei I auga

i comi la cozedura!

_________

7. La cunfisson

ALFREDO CAMEIRÃO

alustriano i la sue gente arrastrában a las cuostas cientos d’anhos

de bida nas bordas de la sociadade, pouco afeita a antender i

aceitar la bida lhibre de ls filhos de l sol i de l biento.

Çalustriano ye cigano: un ciganico duns dieç ou onze anhos, teç quelor de

miel, pelo negro spetado a la sobela i ls uolhos negros siempre als salticos

cumo dous pardales. Listo cumo un rato papialgo, nun habie pobo por

donde passássen que nun lhebasse que cuntar.

Daqueilha beç, dou-le la zízara que tamien se habie de ir a cunfessar.

L más cerca que yá se habie arrumado a la puorta de la eigreija habie sido

an dous ou trés antierros, cun l cheiro ne l çubiaco de la caridade, mas

habie-le antendido als garotos de l pobo que quien se fusse a cunfessar,

apuis tenie dreito a quemungar an la missa i a comer la hóstia, que era assi a

modos a ua bolaixica.

Ora, bolaixicas nun era to ls dies! Apuso-se, strenou-se a antrar n’eigreija i

azinolhou-se ne l cunfessonairo,

- Querie-me cunfeçari, dixo-le al cura, naquel sou modo adocicado de falar,

peç que meio açucrado, cumo se ls “sés” le fazíssen cuçquinhas na lhéngua

i arrebalássen por eilha.

- Anton, i tu sabes la doutrina?

- Cei, ci cenhori, tornou-le Çalustriano, que nun biu outro caneilho por

donde la salida fusse mais segura.

- Bamos anton a ber: di-me alhá, quantas son las pessonas de la Santíssema

Trindade?

Fui cumo quien le tirou l chano d’ambaixo de ls pies.

- Ceran quatro!?

- Nó, nun son quatro.

- Cinco!

- Tamien nun son cinco

- Ceti!

- ...

- Dozi?!

- Nó!

- Catorzi!

- Bá, bamos a fazer assi: tu bas a daprender la doutrina i apuis, quando la

soubires, tornas i you cunfesso-te.

Fui cumo quien ceba i nun mata! Anton l lhambon de l cura abezaba-se cun

la sue bolaixica! Yá quantá que andaba a purparar ls caneiros pa l petisco i

agora quedaba a lhamber guiços!

Saliu de l’eigreija a ferber d’anraibado, cun ls uolhos mi abiertos pa nun

deixar arramar las lhágrimas que sentie a reçumar neilhes.

Iba a passar Pedro Chabiano, l filho mais nuobo de l duonho de l uolmo que

le fazie selombra i le daba agrimo al standerete de ls ciganos.

- El quei te passou, home, que peç que stás capaç de rachar ua fraga?!

- L cura nun me deixou cunfeçari por nun çaber quantas çon las peçonas de

la Çantícima Trindadi.

- Anton tu nun sabes!?

- I tu çabes?... i ua racica de sprança acendiu-se-le ne ls uolhos.

- Anton que milagre que saba!

- I quantas çon?

- Son trés!

- Aaaah - i l’alma de ciganico de Çalustriano fizo-le botar assi a modos de

un relhampo de piadade pul pouco antendimiento de Pedro – bai alhá tu cun

trés! Yá you le mandei catorzi i l home nun quijo star queto!

_________

8. Jarónimo carteiro

ALFREDO CAMEIRÃO

hamo-me Jarónimo i sou carteiro. Toda la bida fui carteiro. Muito

passico i poucas crouas. Muito rechino de I sol, muita mielra

caçada anriba de la mota. Mas an pagas bi muita cousa cun estes

dous que la tierra há de comer. L padre ne l cunfessionairo nun oube más

que you ne l miu oufício. Conheço estes pobicos todos de la tierra de

Miranda. Las praças i las caleijas, Is chabolos i las casas de buiada. I la

giente: Is ricos i Is probes, I nome de batismo i la nomeada; ls que se

morrírun i Is que stan bibos, las alegries i ls delores, l’armana que se morriu

ou la sobrina que nace l més que ben, I filho que pide denheiro ou l outro

que yá fizo casa, este que se çcasou ou aquel que yá ten cumbersada. Las

risas i ls choros cun que la bida se biste. I todo partilhado cumigo, cun

antrada i dreito a un copo i un muordo an to las casas; l carteiro, de ls

poucos que sabe ler.

Sou quaije cumo se fura de to Is pobos, cumbite an to las fiestas, mandiletes

para fazer an Miranda de to las casas. You trago l denheiro de l més, you

lhiebo las anquemendas. La mie paga ye l’amisade de quien me quier bien.

I las cuontas! Muita cuonta!

Quando ampecei, la cunsemiçon yéran las nomeadas: “Francisco Pexangas,

Tortulhas, Pertual” i agora, zanrasca-te, Jarónimo carteiro. Habie que

percurar, stá buono de ber.

– L Pexangas bibe alhá pa riba, nun nun chabolico al pie de l tronco – i alhá

iba la carta dreita al çtino; ou anton, “Zé Taloxa, stubo an la guerra an

Angola, nun ten I dedo gordo de la mano dreita i bibe nua casa branca al pie

de I tanque an Tortulhas”, assi mesmo, todo srebido ne l ambelope, yera un

çcanso, nun habie que anganhar.

L pior yera quando solo traíen I nome de batismo.” António Manuel Lopes,

Tortulhas, Trá-los-Montes”. Ambaixo de l’uolmo de l Minga naide daba

rezon cierta, quien será?, quien nun será?, you sien saber para donde me

birar, palpita ua tie: – Nun será l Calabaças? – I Calabaças nun ye –

arrespunde lhougo I regidor, cumo quien dita ua santença, mi dreito, a

spechucar Is dientes cun ua stielha, naqueilha sue boç de mando afeita a ser

oubida, – I Calabaças chama-se Toninho.

Pus claro!

Alhá bai miu Jarónimo a patear anté casa de tiu Calabaças.

Biúbo, mala sarna, a bibir solo, feitiu squemungado, assi i todo, arrecebiu-

me cun buonas palabras, – anton que nobidade hai? – i cun aqueilha sue

manha de a cada cachico soltar ua cuçpenhadica - tfff - cumo se stubira a

cuçpir tabaco manginairo que le tubira quedado ne ls beiços. Mas abisou

lhougo

– La carta nun ye para mi! – tfff –

– Bó! Antón bós nun bos chamais António Manuel Lopes? – You chamo –

tfff – Mas la carta nun ha de ser para mi. La de la décima ye solo an Maio.

Este més yá bieno la de la lhuç i la de l pré. – tfff – Yá nun falta niua...

Mirei pa la carta: Associação de Vitivinicultores da Terra Fria.

– Bós nun teneis bino?

– You tengo. Quieres ua pinga?!... – tfff –

– Nun senhor, oubrigado. Ye que la carta ben por bias de las binhas.

– Anda-te... i anton quei diç?!

– You nun la abri.

– Pus abre-la – tfff – i bei alhá l que quieren.

Abri la carta. Dues fuolhas. Em virtude da recente reorganiza- do sector...

serie melhor ler you purmeiro la carta toda i apuis splicar-le de l que

trataba. Ampecei. Un cachico. Un cachico más grande. Tiu Calabaças nun

se detubo.

– tfff – Home! You lhougo bi que la carta nun yera para mi. Ya un cacho

que stás a mirar pal papel i nisquera bulhes Is beiços. – tfff – Antendes tu

tanto de letras cumo la mie burra de lhagares de azeite. Se quieres ancangar

la carta, bai a saber doutro, que you nun quiero dessas cumenéncias.

Colou-me sien peç! I nun houbo almica que le fazisse quedar cun la carta,

cun aqueilha me çpachou.

I cun esta bos çpacho you, que hoije nun hai nada para Fuonte Lhadron,

mas inda tengo que chegar a la Granja a lhebar esta carta de l Brasil, ah

Florentina, la mie cerbeija paga-te-la un destes, que nun cúiden pori que ye

solo scuitar las lhonas de l Jarónimo carteiro i nun achegar la barriga al

balcon.

_________

9. Las maias

AMADEU FERREIRA

- anton, yá quemiste las maias hoije? preguntórun-me lhougo a la

purmanhana.

R - inda nó, cuido até que nien tengo castanhas an casa, respundi.

P - bá, anton trata de las amanhar, que quien nun quemir al menos ua

castanha neste die purmeiro de maio puode quedar cun delor de cabeça para

todo l anho, i bien sabes que las delores de cabeça son tan fuortes nestes

tiempos terribles que quieren dar cuonta de nós.

R - ye bien berdade, si tenemos ua castanha bien mala de rober, tu nun bés

las zgrácias que ban por ende?

P - pus l melhor será quemer essas castanhas todas i cagá-las a seguir, i

apuis botar abaixo ls castanheiros que las dan: nun hai die melhor al modo

que un purmeiro de maio.

R - nun sei que te diga, nun sei que te diga, que essas castanhas yá ténen

bicho, nun dan para quemer, hai que las botar pa la rue.

_________

10. L criado mintiroso

CARLOS FERREIRA

a beç un tiu iba cul criado a ua feira, pus era negociante de bacas.

Íban pul camino falando nuas cousas i noutras até que l criado

diç pa el:

- Ah miu amo, na mie tierra bi ua raposa tan grande, tan grande cumo la

puonte de ls siete arcos.

L amo dixo-le anton:

- Mas será assi tan grande?

- Digo-le you que ye tan grande cumo la puonte de ls siete arcos.

- Pus nós bamos a passar por essa puonte i lhougo bamos a ber cumo ye de

grande. Mas hai un porblema, se nun fur berdade, la puonte abre-se i quien

fur an riba, cai-se deilha abaixo.

L criado quedou a pensar naqueilho que l amo le tenie dezido i nun tornou a

dezir nada. Al modo que íban caminando, iba-se anchindo de miedo. A

cierta altura diç pa l amo:

- Ah miu amo, bendo bien, la raposa que bi na mie tierra, talbeç nun seia tan

grande cumo la puonte de ls siete arcos. Serie assi cumo ua burra.

- Nun penses mais nesso. Assi i todo era ua raposa bien grande. L que

amporta ye que la puonte de ls siete arcos nun s’abra quando furmos a

passar.

Cuntinórun a andar, a andar, i l criado nun tornou a abrir la boca. Apuis de

muito andáren, quando ampeçórun a ber la puonte de ls siete arcos al longe,

diç pa l amo pa l criado:

- Mira yá se bei acolhá la puonte de ls siete arcos. Si ye bien grande. Bamos

a ber se mos deixa passar.

L criado nun dixo nada, mas ampeçou a quedar para trás. Mal íban quaije a

chegar a la puonte de ls siete arcos, diç-le l criado pa l amo.

- Ah miu amo, la puonte de ls siete arcos si ye bien grande. Bendo bien, la

raposa que bi na mie tierra, nun era sequiera tan grande cumo un burro.

Bendo bien, acho que era ua raposa cumo todas las raposas.

- Bá, anda palantre i nun penses mais na raposa, diç-le l amo.

Picórun l cabalho i passórun la puonte de ls siete arcos. L amo iba pensando

cumo era berdadeiro l dito de que “l miedo i la mintira, ténen las patas

cúrtias”.

_________

11. L perro scumioso

CARLOS FERREIRA

n tiu rico, tenie un perro que deixou de comer. Un die, an

cumbersa cul çapateiro, dixo-le:

- Tengo un perro pimpon an casa, mas nun sei l que le passa:

dou-le de l melhor, mas nun adelantra, deixou de comer!

- Esse mal bien pouco custa a curar! Traei-me-lo uns dies para mi, diç l

çapateiro.

L tiu trouxe l perro i l çapateiro prendiu-lo a ua pata de l sou talho. Durante

ls dous purmeiros dies, l perro, cumo un zbaçado, alhi stubo deitado sien

dezir aqui stou. Al terceiro die, ampeçou a quedar mais zanquieto i a la fin

dua sumana, yá ambocaba todos ls cachicos de suola que l çapateiro botaba

pa l suolo. Nesse antretiempo, passou puli l duonho de l perro i preguntou al

çapateiro:

- Anton, l miu perrote, que tal bai la sue cura?

- Yá bai muito melhor. Stou-le a dar uas malzinas, mas inda nun stá bien

curado. Passai daqui a uns dies.

L perro, sganganido, culas tripas a pegáren-se-le a las costielhas, yá robie ls

cachos de bezerro q’agarraba a diente.

L çapateiro decidiu anton que l perro staba curado, i lhebou-se-lo al

duonho.

Passados uns dies l tiu rico passou puli i dixo pa l çapateiro:

- Tengo muito que bos agradecer pul perro. Agora come que nien un lhobo!

I nun stá nada biqueiro! Parece-me que se las dira, até piedras comie.

_________

12. Las purmeiras missas de l

pastor

CARLOS FERREIRA

a pastora dua granja bibie sola cul filho zorro i cul ganado. Cumo l filho

nunca habie salido de la granja, quando fizo zuito anhos, la mai dixo-le:

U- Manhana ye deimingo i bás a la missa de l lhugar.

- You nunca fui al lhugar, quantas mais a la missa! Cumo bou a

saber adonde ye la missa! Diç l rapaç.

- La casa adonde bires mais giente a antrar, entras tu tamien i fazes cumo

bires fazer ls outros. Splica la mai.

L rapaç chegou al lhugar i biu muita giente a antrar para ua casa: era un

casamento. L rapaç comiu i bubiu i tornou para casa. La mai perguntou-le

que tal se habie amanhado!

- Mui bien, diç l rapaç, pa l deimingo que ben, torno.

Al deimingo a seguir, cumo nun habie casamento, l rapaç biu to la giente

antrar pa l’eigreija i el antrou tamien. Cumo todos íban a molhar la mano na

pila de l’auga bienta, el tamien fui. Quando bulbiu para casa, la mai

perguntou-le outra beç que tal habie corrido la cousa, i el responde:

- Desta beç yá solo habie ua lhabaraije al fondo dua pila, que nun cuonten

comigo outra beç: nun torno!

_________

13. L Natal de Matias

ALCIDES MEIRINHOS

abie nacido acerca de l mar, adonde bibie cun sous pais que an

tiempos abaixórun de l Praino buscando sustento que nó çufando

tierra. L carro cheno de tralha i de suonhos mal passara la sierra

de ls tarantanes quando sal ua pregunta:

- Quantos quilontros fáltan?

- Drume-te rapaç que inda mal ampeçou l camino, fáltan quaije que 300…

300 quilontros? Inda haberie muita strada que fazer antes de chegar a la

Tierra de l Natal de Matias. L ritual repetie-se todos ls anhos: quaije que por

finales de dezembre, chubisse que nebasse, haberie que passar las sierras

pulas regubiuras de la strada caras a la Tierra de Miranda. Anquanto

cuntaba las curbas atado a la cadeirica sentie ambeija de l armano, algo

maiorico, que iba sintado cumo ls grandes, menos acorreado, arrimado a la

jinela i cun campo para sticar las piernas. Más uns minutos tornaba:

- Quantos quilontros fáltan?

- Inda hai un cachico de strada que fazer, anda que quando te aporcatares yá

abistas la prainada…

Nien ls caramonos que sou armano i sue mai l dában para que se

antretubisse lo fazien zbiar la eideia de l Natal na tierra de ls abós. I nunca

más aparecie la fita de ginasta, azulada a sbolaciar parada ne l redundel de

la strada a la antrada de la cidade. Staba quaije, mas cumo dezie l bispo de

Ébora açpuis que porqui andubo: Miranda fica no último fim de mundo! ou

cumo scribe l poeta: las cuostas de l paíç que naide bei al speilho!

A pouco i pouco íban aparecendo las cereijeiras znudas de la borda de la

strada no abaixar bagaroso até la casa de sous abós. Eilhi podie correr a la

farta, angaiolar-se nas ramalhadas, cumbinar cun ls primos, benidos de la

lunjura d’outras Lisbouas, la melhor maneira de ir pul pinho. Haberie que ir

a saber dun pinho para anfitar de maneira a que l Pai Natal benisse de saco

cheno a poner las prendas debaixo. Yá solo pensaba na nuite de Natal,

quando antes de cenar, l Pai Natal, cumo que por artes mágicas i sien naide

lo ber, deixaba las prendas ambaixo i ne l meio de la árbol anfitada.

Relhoucaba cun esse sfregante mágico i alegre que ponie la família toda

junta: primos, pais, tius, abós.

A fin de cena, apuis de l bolho rei i de las rabanadas, de ls checolates

ferrero chegados de Fráncia, de las azebias i de ls uobos moles, las bistas

nun lhargában las caixas i saquitos anrebulhados cun papel de quelores

garridas atadas cun fitas i lhacicos… i ua eitiqueta cul nome para quien

serie essa prenda. Quantas tenerien l nome de Matias? Ua eilhi, apuis outra,

ua maiorica meio scundida… la cousa staba-se a cumponer. Cumo Matias

inda nun sabie ler por isso sou armano lie l nome screbido na eitiqueta i el

eirie an corrida alegre a dá-la a la pessona agora ama de la prenda: un ritual

que zde siempre daba fé de sentir nessa mágica nuite de cunsoada.

Chegada la hora, siléncio!

- De l Pai Natal de Fráncia para Tie Anica! apregonaba l armano Mário, i el,

mirando sue Tie Anica, corrie a antregá-lo más debrebe que Tiu Abel

carteiro.

Más ua corrida i outra i outra até que al redor de l pinho anfitado yá solo

sobraba ua caixa cun lhaço i eitiqueta a dezir: Matias. La última para mi,

pensou. Mas nun serie de l Pai Natal malo? Ye que todos ls anhos un de ls

primos, por pirraça, fazie ua prenda de fai de cuonta, solo pa la risota.

Matias agarrou-la çcunfiado, ampeçou a çcascar ls papeles al redor de la

caixa, abriu-la debagarico, nun fura pori a salir deilhi un sartigalho pa lo

assustar, quando al remexer las tiras de jornal andrento, ampeça a sacar ua

cebolha, dues batatas i ua cabeça de alhos. Mira curjidoso para aquilho, mui

sério, i quando todos pensában que se iba a anraibar, bira-se caras al pai i

diç: toma pai, ye pal caldo!

_________

14. Natal de tie Bernixe

ALCIDES MEIRINHOS

orriu l ferrolho i al puxar pula argolha acerca la fechadura batiu l

postigo. Sacou la chabe que guardou na jabeira scundida ambaixo

la racha de la saia ne l quadril de l lhado dreito. Agarrou l caiato

stribado no tranqueiro i apuntou ruga arriba adreitos a l’eigreija. Botou ua

praga abafada pul lhenço negro amouchado cul xaile de la mesma quelor,

um búltio que a pouco i pouco se desipaba antre la nubrina que habie ua

semana todo ancubrie. L bater cumpassiado de l caiato ne ls paralelos era l

único sonido que se oubie para aqueilhes lhados: sobrarien uas trinta almas

i outras tantas cereijeiras a la borda de las rugas i de la strada. Naqueilhes

dies de cenceinho sien cenceinho, la yerba fresca crecie antre ls paralelos,

biçosa cumo nun cerrado ne l més de maio criando ne l suolo ua manta

berde als quadros de cantaria, más berde nas bordas de la ruga i quelor de

piedra al meio, paralelos batidos donde an onde por ruodas de ls altemobles

i ua ou dues almas que pulhi repassinarien. Las squilas yá quantá que solo

pul termo tocában, quedórun más asseadas las rugas sien buostas nien

bramidos, yá nun pace la cria nas bordas de l ribeiro, crece la yerba i

atelondra l siléncio meio abafado pul mofo de ls puiales.

Rodou la chabe grande de la puorta de l’eigreija mesmo de frente a la

piedra de l pendon de l outro lhado de l sagrado, chiórun las missagras

afeitas a muita ferruge por falta de uso, l caiato passou la çapata cumo quien

guia camino a piernas cansadas stribadas an jogas i nocas gastas. Talbeç que

seia l rematismo anquanto bota la mano al quadril nun géstio bagaroso

agarimando las delores i andreitando la spina. Nó! ye que delantre de l Nino

Jasus nun poderie dar parte de fraca, siempre fura capaç de s’amanhar eilha

sola yá iba para meia dúzia d’anhos zde que amortalhara l sou Juan, que

Dius lo tenga na paç de las almas, nó! que anquanto ls uolhos negros nun

parássen de relhuzir, naide la oubirie a botar un gemido ou un queixume.

Haberie de rejistir até que la menina de ls uolhos bulhisse i cunseguisse

defrenciar l calatriç de ls bezinos i de ls nietos cumo agora que miraba las

palhicas de l persebe, la baca, l burro i las canhonicas spargidas puls mofos

i pedricas al redor de Maria, de Jesé i de ls reis Magos. Aparecie eilhi

deitado todos ls anhos pul solstício d’eimbierno aquel nino znudico que

nunca tembraba cul friu ou la gelada, l único que naquel lhugar nacie na

chegada de l carambelo, iba para más de quinze anhos. Inda daba fé de

quando naciu Antonhico, nieto de Manuol Cabreiro, yá l pai habie

eimigrado para Anglaterra i para adonde passados uns meses seguirie

tamien l ninico cun sue mai i l’armana Eirene. Solo las cereijeiras eilhi

quedában porque las raízes las mantenien bibas naquel suolo, nun fura isso

tamien eilhas eimigrarien an busca d’auga i sustento Ouropa fuora ou anton

nas cidades acerca de l mar, auga i sustento que pulhi scasseában a cada die.

I fui-se quedando sintada ne l banco de madeira barrendo cul mirar toda la

parte de riba de l’eigreija cumo quien busca la streilha anunciadora antre l

carrasco algodonado de l Presépio i l sacrário ne l altar mor.

A la tardechica anchie la cesta de lheinha que ls sous, ende pula Páscoa,

habien deixado cortada i ansartada na curralada: cepos de frezno, tuoros de

barejon, galhas cortadas i carqueijas para acender. Era ua maneira de tener

cumpanha durante las nuites grandes i fries anquanto fazie de cuonta que

las amboras i las nobelas de la telbison éran amportantes. Açpuis de muito

remexer na cinza cumo quien ajuda las brasas a çfazer-se, acobelhaba l

lhume, apagaba la lhuç i arrimaba-se a la cama sien deixar de mirar l quadro

de Nuosso Senhor de la Piedade colgado na parede de l fundo de l quarto, l

retrato dun Cristo cun sue faixa roixa a cair de ls braços de la cruç a lembrar

l sufrimiento por que muitos mortales tenerien que passar para quedáren

“purgados” de todos ls pecados. L amportante era ancreditar-se siempre

nessas cousas de relegion, mas tamien a las bezes tie Bernixe se preguntaba

porque ye que nun habie más mirandeses heireijes, afinal la sue lhéngua

nunca habie antrado na casa de Dius i por muitos pedidos que l fazíssen nun

habie naide pals traduzir. Se calha era por isso que yá iba para dous natales

que ls nietos de Fráncia nun benien a la lheinha pa la fogueira de Natal…

_________

15. La mona negra

ALCIDES MEIRINHOS

abie dous cepos no lhume, seinha de fiesta ou matáncia, que l

más de la eimbernada l fulhin de las paredes i de ls canteados

acrecentába-se cun l fumo de dous guiços ratunhados no

cuncelhiu i alumiado por meio gamon metido nas lhares, an lhança, adreitos

afuora. Solo l relhuzir de las bistas cobraba l mortiço i l negro de la cozina

forrada cun meia dúzia de baras de fumeiro. Al menos haberie botielho no

Natal i nos Reis, ua scuridon lharga cumo nuite d’Eimbierno adonde

antraba, pul campo de las teilhas cabalho que serbien de chupon, ua racica

de lhuna clareada de gelada. Negras i fries las nuites arrimadas a cada fin de

més de las matáncias i de l Nino Jasus, menos aqueilha nuite de lhume

fuorte cun l pote a bafiar l cheiro a polbo, batatas i berças, candeia a gáç,

turron de Mobeiros i meia quarta de nuozes i almendras mercadas na feira l

Naso a uns comerciantes de por ende abaixo de las arribas. Á! que la cena si

iba a ser de chupita! Tamien poderie spenhicar de las ubas guardadas an

ramalhete na prieça de casa zde las bendimas! Todos ls dies a mirar para

eilhas i solo naqueilha nuite l botarie l diente apuis de tanta cuçpinha tener

angulhido manginando l gusto que inda tenerien.

Malgarida, feita lhabandeira abanando l rabo pul lajedo de piçarra de la

cozina, ora poulaba dun scanho para outro, assomaba-se a la prieça de casa

mirando adreitos a ls colgadeiros de ubas de rei, ouferecie-se para ajudar a

cumponer la mesa, ancabriolaba-se no regaço de sou armano más bielho

que benira de Fráncia la purmeira beç, apuis de soutranho haber passado a

salto, ou anton pedie a Bitór que le cuntasse ua cuonta. Un tarabielho!

- Á! Sabes? preguntou el, hoije si te cunto la cuonta de l Nino Jasus apuis

de cenarmos.

Mal maçcou las batatas i l polbo cun las ganas que tenie de oubir la cuonta.

Bitór yá andaba no quarto anho de seminairo an Bergáncia i sabie andonar

bien la cousa. Dezie-las tan bien que quaije todo mundo s’ancreditaba nel.

Faramalha nun faltaba. Nien l sermon de l bispo, no Naso, ancandilaba

tanto cumo las palabras sérias de Bitór. Aposque si iba a dar un cura de

purmeira auga.

Inda l azeite relhuzie na pocica de l queixo de Malgarida quando l armano

antre dues garfiadas ampeça cun ar grabe i sabedor de cuontas:

- Sabes que fiesta ye hoije?

- Hoije nó! Diç que manhana ye die de beisar l Nino znudo que punírun

nuas palhicas de centeno no presépio que fazírun l outro die na eigreija.

Tenie tanto mofo que traírun nuns cestos de las paredes ambaixo l lhugar!

Bien que se me antolhórun dalguns monicacos para morar: uns canhonicos,

un burro, ua baquita, até habie uns que stában bestidos de reis! I nien me

deixórun pegar neilhes. Assi, tengo que me baler de las piedras i de las

bolhacas para monas.

- Pus esse Nino bai a nacer esta nuite!

- Anton nun naciu yá? Preguntou Malgarida de l alto de sous cinco anhos

acabados de fazer.

- Sí, buolbiu Bitór, mas sabes que todos ls anhos l Natal ye la fiesta de l

Nino Jasus - i cumpassiou la boç - tamien todos ls anhos quando nace, l

Nino Jasus abaixa pul sítio de l lhume i deixa cousicas i lhembráncias nos

çapaticos que las pessonas pónen a modos al pie de l murielho, ou na

chubineia.

De cuntino ls uolhos de Malgarida parecien dues centeilhas i cumo un

caramonico eilástico debrebe saltou de l scanho, botou-se a correr adreitos

al quarto i an menos de nada se apersentou cun l sou único par de çapatos,

uns çapaticos de agulhetes feitos an calfe amarielho que sou pai habie

mercado na feira de l Naso a fin de Berano. Arrodiou la mesa, barriu ua

squinica al pie de l estrefegueiro i yá se purparaba pa ls deixar eilhi, nó un

mas los dous, porque se esse Nino que dezien deixaba cousas nun çapatico,

anton nos dous melhor parte l tocarie. I lhougo a eilha que nunca naide l

habie dado nada a nun ser sue mai, ua beç, ua caiata d’arrebuçado de San

Marcos, agora más que isso nien l bestido d’ua mona sequiera … i se fur ua

mona? Pensou. Tanto cumo eilha querie tener ua mona cun piernas, braços,

pelo para peinar, bestidos para tirar i poner, lhabar, coser. Á mai! que

buonas tardes de monas passarie.

- Nun los puodes deixar inda, porque El solo ben apuis de todo mundo star

na cama a dormir. Sabes que se bei gente spanta-se i apuis deixa todo nuas

casas i nada nas outras!

- You tamien lo quiero ber – tornou eilha – i bien gustarie que astanho me

deixasse algo, el que nunca me deixou nada!

- Mira, apuis de cenar i de mos irmos a la cama, bonda deixares un çapatico

tou ende na squina de l strefegueiro a ber se manhana ten algo alhá.

Outro remédio nun tenerie, mas solo un? I tan pequerrico? Inda cabie alhá

ua monica ou anton ua bolsica de necras de bidro, ou l que l Nino Jasus

pudisse abaixar pulas lhares, mas la mona siempre era más lebe que las

necras.

Quemiu de las ubas que tanta gana tenie, nuozes i terron, mas la eideia iba

siempre a parar no çapatico amarielho que haberie de deixar ne l murielho.

Apuis de más uas cuontas, cepos feitos brasa i tiçonicos, quedou l siléncio

de la nuite, solo cortado d’onde an onde pul piar de l moucho no uolmo de

la cigunha. I Malgarida de oubido fuora de las mantas a ber se sentie un

tlincar de las lhares ou l zbiar de las teilhas para que l çapatico nun

quedasse anaiunas … até que se dormiu.

A la purmanhana cedo, antes de sue mai acender l lhume, Malgarida atirou-

se de la cama cumo un foguete adreitos al çapatico amarielho, agarrou-lo

mas nun biu nada, apuis chocalhou un pouco, i andrento ua moneda de

croua.

- Á Bitór!! Bitóóó… solo me deixou ua croua!!

- Al quei? Á! Sabes? respundiu l armano, ye que no purmeiro anho deixa

siempre a pouco.

Anfeixou-se la boç, apetecie-le chorar, mas dado era dado.

- Mira que fui bien garunho cumigo l Nino Jasus. Se fai assi an todas las

casas nun haberá muitos ninos a gustar del!

Quando tubo la purmeira mona, noutro Natal talbeç, negra, trazida de

Martinica por ua francesa patrona de sue mai, bieno a la mimória l negro

folhin que cubrie las paredes de la cozina an Pertual i la croua a chacolhar

no çapatico cumo quien fai caçoada i atira un çton pulas frinchas de las

teilhas.

Tan loinge moraba l Nino Jasus de Malgarida

_________

Fim

Títalo: La Fala Screbida – Cuontas an mirandés

Outor(a): Bários

Eilustrador(a): Ana Afonso

Eiditor(a): ALCM – Associaçon de Lhéngua i Cultura Mirandesa

Rebizon: Alcides Meirinhos i Suzana Ruano

Paginaçon: anafonso.com

Coordenaçon Editorial: Alcides Meirinhos i Suzana Ruano

Eiditora: ALCM – Associaçon de Lhéngua i Cultura Mirandesa

ISBN: 978-989-53199-1-6

Data de Publicaçon: dezembre de 2024

Formato: E-Book

Direitos Autorais: ALCM